31 мамырда Лисаков қалалық мұражайында «Рухани жаңғыру» бағдарламасының аясында халық батыры, қазақ халқының ұлттық азаттық көтерілісін ұйымдастырушысы Амангелді Имановтың 145-жылдығына арналған «Амангелді Иманов - халық батыры» мұражай сағаты өткізілді. Шараға №3 орта мектебінің 3 және 7-сынып оқушылары қатысты. Іс -шараның мақсаты: патриоттыққа, тарихты сыйлауға тәрбиелеу, оқушыларды 1916 ж. қазақ халқының ұлттық азаттық көтерілісінің ұйымдастырушысы Амангелді Имановтың өмірі мен қызметімен таныстыру.
Шара барысында мұражай қызметкері Қадырханова А.Қ. 1916 жылы Ұлт-азаттық көтерілістің басшысы Амангелді Имановтың жерленген жеріндегі ескерткіш «Киелі Қазақстан картасы» жобасына енгізіліп, жалпыұлттық маңыздағы қасиетті нысаны тізіміне кіргенін айтып берді. Осы ескерткішпен қатар басқа да киелі жерлер туралы ақпараттарды және осы жерлерге отбасымен саяхатқа шыққан күнде Qazmap.kz және ruz.kz сайттарына кіре отырып, барар нысанға бағыт-бағдар алуға болатынын интернет арқылы көрнекі көрсетті. Сонымен қатар, мұражайда осы тақырыпта шағын және жылжымалы көрме ұйымдастырылды. Шағын көрмеде балалар мұражайда батыр бабамыз жайлы айтылған деректердің куәсі болатын мұрағат құжаттары мен фотосуреттерін және сарбаздар қолбасшысы А.Имановтың қызыл туын және Амангелді батыр ерлігі туралы жазылған кітаптар мен газет мақалаларының қиындылар жинағын шағын көрмеде көзбен көрді. Аталмыш материалдар Қостанай облыстық тарихи- өлкетану мұражайы қорынан, сонымен қатар Лисаков қалалық орталықтандырылған кітапхана жүйесінің кітаптар қорынан ұсынылған.
Жылжымалы көрмеден Амангелді Иманов жерленген жердегі ескерткіш туралы, Амангелді Имановтың өмірбаяны, А.Иманов атындағы Амангелді мемориалдық мұражайы туралы және «Рухани жаңғыру: ұлт болашағы» бағдарламалық жобасы аясында еліміздің киелі жерлері мен тұлғаларға виртуалды саяхат жасауға мүмкіндік беретін онлайн – қолжетімділік жөніндегі мәліметтер мен фотосуреттерді көруге болады. Мұражай сағатының соңында Амангелді ауданында болып, айтулы тұлғаның жерленген жері мен мұражайында болған балалар өз алған әсерлерімен бөлісті.
«Аманкелді Иманов – Ұлт - азаттық көтеріліс 1916 жыл» атты Бауыржан Бөгенбайдың деректі фильмі көрсетілді.
